XII
Deux ans sont ja passez, vous le sçavez Maistresse,
Quand pour vous estrener je vous donné mon coeur,
Qui depuis est resté vostre humble serviteur
Sans vous avoir manqué de foy ny de promesse.
Traittez-le humainement et luy faites caresse
Seulement d'un trait d'oeil, ou de quelque faveur
Dont il puisse alleger la charge du malheur
Qu'il souffre en bien servant une si fiere hostesse.
Non ne le faites pas, traitez-le rudement,
Je connois son humeur, il vous sert seulement
Pour tirer du plaisir de son plaisant martyre.
Je tenois ces propos quand mon coeur dépité
Dist, J'aime mieux cent fois perdre ma liberté
En servant ses beautez qu'estre Roy d'un Empire.
