VI
Ce jourdhuy que chacun prodigue sa largesse,
Liberal je vous donne en estreine mon coeur:
Encor que le present soit de peu de valeur,
Ne le refusez pas je vous supply maistresse.
Logez-le pres du vostre, et soyez son hostesse,
Il n'est pas importun, rapporteur ny menteur,
Et sçay qu'il vous sera fidele serviteur,
Si de vous il reçoit quelque douce caresse.
Donnez-luy tant soit peu d'honneste liberté,
Ouvrez-luy le thresor de vostre volonté,
Soyez-luy comme un roch constante et non muable.
S'il peut gaigner ce poinct il est recompansé
Des faveurs qu'il pretend, et trop mieux avancé
S'il cognoist seulement qu'il vous soit agreable.
