Elle mesme
C'est maintenant qu'il faut que librement je die
Tant m'estes importun, que vous me cajollez,
Taisez-vous je vous pry, Monsieur, vous m'enjollez
De vos propos succrez qui m'ont toute estourdie.
Or qu'en me caressant, vostre ame, vostre vie,
Vostre espoir, vostre coeur, humble vous m'appellez,
Je sçay sous ces beaux mots que vous dissimulez,
Et cachez doucement le nom de vostre amie.
Anda je ne veux point vous servir de jacquet,
Je sçay ce que l'on dit, et comme le cacquet
Mesme entre nos voisins se jette à l'avanture.
Mais je merite bien avoir un serviteur
Qui m'aime et me caresse et me donne son coeur,
Et non pas de servir d'ombre et de couverture.
