Cartel
Ce jeune Chevalier en tous nouveaux allarmes
Amoureux de l'honneur, et d'Amour et des armes,
Ores qu'il soit foiblet à porter le harnois
A cheval ou à pié, ou à rompre le bois
Justement de droit fil d'une lance guerriere,
Manier de pié coy, en rond ou en carriere
Le cheval courageux, a sceu qu'un grand tournoy
Se dressoit promptement en la Cour d'un grand Roy,
Et que nul n'y pouvoit y monstrer sa proüesse
Sans porter les faveurs d'une belle maistresse.
Doncques je vous supply par vos rares beautez,
Source de cent rigueurs et de cent cruautez,
Par les chastes attraits de vostre bonne grace,
Par le crespe doré qui luit sur vostre face,
Par toutes les bontez et toutes les douceurs
Qui logent dans vostre ame et travaillent nos coeurs,
Me faire tant d'honneur en ceste fleur premiere
D'une douce faveur honorer ma priere:
Me sentant animé du gracieux accueil
De vostre bonne grace et faveurs de vostre oeil,
J'espere, courageux, de vous faire parestre
Qu'au monde n'y a rien qui mieux arme la destre
D'un jeune Chevalier, et luy hausse le coeur
Qu'Amour, guide fidelle à rechercher l'honneur.
