Cartel
Ces Chevaliers d'honneur qui n'ont rien dedans l'ame,
Ny plus avant au cueur que l'amoureuse flame
Qui sort des traits aigus de ce petit Archer,
Quand de son arc voûté viennent à décocher,
Advertis qu'en ce lieu se dressoit une lice
Pour rompre ou pour jouster, et pour faire exercice
Des Armes, et d'Amour, et par acte guerrier
Porter le front couvert de l'honneur d'un Laurier,
Sont venus en ce lieu pour mettre en evidence,
Faisant à coups de main preuve de leur vaillance
Et courage gentil, voulant monstrer à tous
Qu' à la seule faveur d'un oeil gentil et doux
Ne veulent espargner ny le sang ny la vie,
Ny le bien, ny l'honneur, et que la seule envie
Qu'ils ont de vous servir, est cause qu'en ce lieu
Sont arrivez soudain tous épris de ce Dieu
Que l'on appelle Amour, pour monstrer leurs proüesses
Devant les yeux mignars de leurs chastes maistresses,
Et pour espandre aussi et la vie et l'honneur
Pour acquerir sans plus le nom de serviteur.
