XVI
Eussé-je autant de fois baisé ta bouche tendre,
Ta paupiere, ton oeil, ta gorge, ton beau sein,
Que j'ay baisé de fois la lettre que ta main
Depuis trois jours, mon coeur, secrette m'a fait prendre.
Eussé-je autant de fois retiré de la cendre
Des sepulchres Gregeois, et du marbre Romain
Pour celebrer ton nom quelque antique dessain,
Que j'ay releu de fois le sujet pour l'apprendre.
Or le sçachant par coeur le plongé dans le feu
Sous le papier musqué: aussi tost que l'ay veu
En cendre s'amortir, et promptement s'esteindre,
Est-ce le feu, mon Coeur, qui me brusle importun,
Plus celeste et plus vif que le nostre commun?
Ouy: car le plus ardant gaigne tousjours le moindre.
