XV
Depuis que je baisé ta bouche vermeillette,
Et que je suçotté le petit bout moiteux
De ta langue succree, et tasté bien heureux
L'yvoire doux poly de ta cuisse douillette:
Depuis je n'eu repos, une flamme secrette
Aussi tost dans mon ame escoula par les yeux,
Et de soupirs ardans un escadron venteux
Pres d'elle se campa pour servir d?échauguette.
Qui dormiroit, mon Coeur, nourrissant dedans soy
Tant d'ennemis ensemble, ainsi que dedans moy
Sans tréve nuict et jour je nourris miserable?
Mais sçachant bien, mon Coeur, que sous vostre bonté
Vous ne cachez rigueur, dedain ny cruauté,
J'espere qu' à mon mal vous serez secourable.
