XIII
Maistresse croyez moy je ne suis point menteur,
J'en appelle à tesmoin les troupes immortelles
Quand en mes jeunes ans ce Dieu qui a des aelles
Ficha premierement ses traits dedans mon coeur.
Oncques je ne senti l'amoureuse rigueur
Ny le fer aceré de ses fleches cruelles,
Si fort que maintenant que sous vos graces belles
Avez plongé mon ame en extreme fureur.
A cela je le sçay, vous me direz, Maistresse,
Que la flamme d'Amour n'est pas souvent l'hostesse
De l'hyver bruineux qui rend le poil grison.
Je sçay bien toutesfois que les flammes plus fortes
Croupissent bien souvent dessous les cendres mortes,
Et que le feu s'allume en tout bois de saison.
