X. Sur une Lettre bruslee
O cruauté d'Amour, sera donc toy Vulcan
Qui bruslera, cruel, de flamme vengeresse
La lettre que la main de ma chere maistresse
Secrette m'escrivit aux premiers jours de l'an?
Est-ce le souvenir de ce Dieu Thracien
Qui t'espoinçonne encor de jalouse destresse
Lors que ta femme et luy, de chaisne tromperesse
Couplez devant les Dieux tu les mis au carquan?
Vulcan, je ne suis pas de nature guerriere,
Ne soit jaloux de moy, et ne soit heritiere
Ta flamme de la lettre où je voy peint mon heur:
Mais s'il la faut brusler, ta force je despite,
Amour me voulant bien, l'a de son trait escrite,
Pour la sauver du feu, au profond de mon coeur.
