VIII
Un si gentil esprit que le vostre, Maistresse,
N'est point sans sentiment des amoureux appas,
On le voit à vos yeux, on le voit à vos pas
Pleins de la majesté d'une grande Princesse.
On le sent aux baisers, on le voit à la tresse
De ce poil chastaigner qui me tient en ses las,
Encor vous le niez: peu d'honneur ce n'est pas
D'un grand Dieu comme Amour se pouvoir dire hostesse.
Doncques je vous supply ne dites plus, mon Cueur,
Qu'Amour mesme des Dieus et des hommes vaincueur
Ne tient plus assiegé le rempart de vostre ame:
Ou ne me faites plus cest accueil gracieux,
Et ne jettez sur moy le charme de vos yeux:
Lors je confesseray que n'aimez point, ma Dame.
